Nikhat cu John Bily cu lungnuam lo ngaiin riantuan ah ai thawh. Chun cu a hung phan i rawlchanh dingin naute cu pawkin an kal a hlatnawn in khin kadawt na baatuk maw tiah Merry Ma Ma nihcun a hei chawnh i John Bily nihcun kadawt nan rak phan cang maw tiah a kut a heizo ah khin ruah lopiin lungrialnak sehnih a angki ban cu a rak lak sual i duhsah duhsah in a dawtmi Merry le a fahning te hmai ah mitthil he nunnak liam in caan an rak hman. Sehnih a rial cuahmah liopi John Bily nihcun kadawt ka fanu a min ah Ely Ma Ma-John tiah na sak lai a ti hnu in sehnih a rial dih cikcek. Kadawtmi John Bily zeitin dah keimah lawngin vawleicungah kar ka hlan lai i, zeitin dah ka fanu caah khua ka sak lai tiin lunghno taktak in Merry MaMa cu a tap riangmang. Naute nih kapa athi tiah ruah ding zeihmanh a thei lo.
Merry Ma Ma cu inn lahkhah a pe khotilo i nikhat cu khua a ruah ka fanu caah tiin a pasal a tuannak lungrialnak hmun ahcun riantuan dingin ai timtuah ve cang. Apasal a tuan cianak asi caah an tuan ter ve nilinh lakah khua al lak ah thlantiput in fanute dawt ruangah kut zaphek tlek dih tiangin rian a tuan. Rian a tuan lio ah a fanute cu ngaidem tang hmanh ah chiahkhawh loin nilinh lakah bawm pakhat chungah a rak ihter. Nikhat hnu nikhat in a tuan i fanute zong upa lei a hun panh ve cang caah kum 5 asi ve cang. Kum 5 asi tiangah fanu a dawt tukmi Ely Ma Ma-John nih kakhat hmanh a kaachung in kanu ka rawltaam kati hal tiah a holh rih lo.
Umnak inn an neilo caah fanu sianginn a kaikhawhnak ding ca le inn a neih khawhnak ding caah tiin rian a tuan. Zaanlei a chuak thingkung lianpi pakhat tangah zaan khuadei nikhat hnu nikhat in fikfa lakah caan an rak hmang. Fanu te cu a fimtuk caah a tu tiang kaakhat hmanh holh loin a umnak asi. Ka rawltaam le kati hal caan ah ka tap ahcun kanu a lungrethei tuk sual lai tiah holh loin Ely ngakchia te cu a rak intuar nak asi. Holh a duhtuk konain lungfim ngakchia asi caah hringtu anu harsatnak cu a hrawmh ve. A nu cu nilinh lak i rian a tuannak ah a kut le a ke nih an celh ti lo i tuan kho loin nikhat cu a rak um. Ely nihcun a nu a thawh lan ah a tho i a nu a kut le a ke cu tilum te hmanh so kholoin tikik tein a rak nampiak. Anu cu a baatuk caah zeihmanh thiloin ai hngilh rih ko.
Anu cu ruahlopiin a van i hlau i afanu cu zeidah na tuah tiah a van hro ii, fanu te cu lunghno in khatlei thingkung phen te ah zaam in a mitthli tla in a tap riangmang. Hringtu a nu nih a va dawi i kafa na nu kapalh tuk ka ngaithiam mu tiah a ti. Ely nihcun a van i thawh i ruahlopiin a nu cu a van chawnh Kanu hawi bantukin ruah a sur caan le ni a linh caan ah i dornak ding caah inn kan neilo maw tiah a nu cu a van hal riangmang. Hringtu a nunih fanu dawtmi a aw a theih tikah a lungfah a celh lo ii, ka fanu a holh kho ka fanu nih a nu a ka chawnh tiin fanu dawt cu a taangcungah pom in lunghno taktak in an nufa in mithli he anpa John Bily zong philh lo zuun ngeih in an tap riangmang. Ka fanu na caah inn a um ko tiin fanu tein lungrawk lai sian lo tuk ah a nunih mitthli he a hnemh. Fanu ngakchia te nihcun a nu biangcung i mitthli cu hnawhpiah in kanu taphlah mu kanu na tapmi ka hmuh ahcun ka ngeihchiatuk tiin fanu nih a nu cu a hnemh ve. Kanu na tuanmi rian paoh ah ka ti khawh tawk in kan bomh la tiah fanu dawt a fimmi a nu min le a pa min telh chih in min sakmi Ely MaMa-John nih a nu cu bia a kamh. ( a dong)
Hmailei an kar hlan nak ding konghi ruah ah ngeihchia ngaingai asi ko . Sihmanhsehlaw fanu fim ngakchia a neih caah hringtu a nunih a hnemh kho i, fanu ngakchia te zongnih a nu biangcung mitthli a hnemh kho ve.
( peh than ding hna a um sicun ka van i zuam zau la)
Channews Daily
No comments:
Write comments